GLOBALLASHUV SHAROITIDA TURKIY DAVLATLAR TASHKILOTI TARIXI VA ISTIQBOLINING MAHALLIY HAMDA XORIJIY TADIQOTLARDA O‘RGANILISHI

Аннотация

Ushbu maqola XXI asrning dastlabki choragi davomida shakllangan va rivojlangan hamda tobora yirik, xalqaro tashkilotga aylanib borayotgan Turkiy Davlatlar Tashkilotining rivoji, davlat rahbarlarining sammitlararo uchrashuvlari natijalari, ilmiy-madaniy doiralardagi hamkorligi masalalari shu soha bo‘yicha ilmiy ish olib borayotgan tadqiqotchilarning asarlari asosida shakllantirilgan. Globallashuv sharoitida Turkiy Davlatlar Tashkilotining tarixi va kelajak istiqbolini barpo qilishda mahalliy va xorijiy tadqiqotchilarning ishlarini batafsil o‘rganish, solishtirish, qiyosiy va tahliliy yondashuvlar asosida o‘rganish bugunning dolzarb mavzularidan biri sifatida ahamiyatga ega.

Maqolada asosan davlat rahbarlari, hamda bir nechta tadqiqotchilarning ishlariga o‘rin berilgan. Said-Abdulaziz Yusupovning “Zamonaviy Turkiya: ko‘hna tarix va buyuk kelajak” nomli ommabop risolasi, Qahramon Rajabov va Bahodir Qandovning “Jahon mamlakatlari va xalqaro tashkilotlar” nomli jahon mamlakatlari tarixi va geografiyasi hamda siyosiy boshqaruviga oid kitobi, O‘zbekiston Respublikasi Prezidenti Shavkat Mirziyoyevning “Yangi O‘zbekiston strategiyasi” kitobi, Turkiya rahbari Rejep Tayyip Erdog‘anning “Dunyo yanada odil bo‘lishi mumkin” nomli kitobi, Yelena Parubochayaning “Turkiy davlatlar sammitlari (1992-2001 – yillar): hamkorlik uchun real platformami?” va “Zamonaviy bosqichdagi Turkiy dunyo integratsiyasi” maqolalari, R. Veyselning “Turkiyaning Markaziy Osiyo mamlakatlari madaniyat va ta'lim tizimiga ta'siri”, F. Yusupovaning “Turkiy Davlatlar Tashkilotining rivojlanish tarixi va xalqaro huquqdagi o‘rni” nomli ilmiy maqolasi, M. Mustofayevning “Turkiy davlatlar tashkiloti: yangi global yondashuvlar va mintaqaviy muammolar”, A. Mirkomilovning “Turkiy davlatlar tashkiloti doirasida madaniy-gumanitar hamkorlikning yangi imkoniyatlari” maqolalari va “Turkiy Kengash: Naxichevan kelishuviga 10 yil” nomli maxsus yubiley uchun chop etilgan kitob to‘plamidagi O‘zbekiston Prezidentining “Integratsiya va hamkorlik uchun yangi imkoniyatlar” ilmiy maqolasi shular jumlasidandir.